ነቢዩ (የአላህ ሶላትና ሰላም በእርሳቸው ላይ ይስፈንና) አጎታቸው አቡጧሊብ ዘንድ ጣእረሞት ላይ ሳለ ገቡና እንዲህ አሉት: አጎቴ ሆይ! በርሷ ምክንያት አላህ ዘንድ የምመሰክርልህን ቃል "ላኢላሃ ኢለሏህ" በል። አቡጀህልና ዐብደላህ ቢን አቢኡመያህም "አቡጧሊብ ሆይ! የአባትህ የዐብዱልሙጦሊብን መንገድ ትተዋለህን?!" አሉ። የጣኦት አምልኮዋቸውን ለማለት ነው። አቡጧሊብ በመጨረሻ ንግግራቸው ላይ "በዐብዱል ሙጦሊብ መንገድ ላይ ነኝ!" እስኪሉ ድረስም ይህን ከመጎትጎት አልተወገዱም። ይህም የሺርክና የጣኦት አምልኮ መንገድ ነው። ነቢዩም (የአላህ ሶላትና ሰላም በእርሳቸው ላይ ይስፈንና) "ጌታዬ እስካልከለኝ ድረስ ምህረትን እለምንልሃለሁ።" አሉ። ይህ የአላህ ንግግርም ወረደ: {ለነቢዩና ለነዚያ ላመኑት ለአጋሪዎቹ የዝምድና ባለቤቶች ቢሆኑም እንኳ እነሱ (ከሀዲዎቹ) የእሳት ጓዶች መሆናቸው ከተገለፀላቸው በኋላ ምህረትን ሊለምኑ የሚገባ አልነበረም።} [አት-ተውባህ: 113] በአቡ ጧሊብ ዙሪያም ይህ የአላህ ንግግር ወረደ: {አንተ የወደድከውን ሰው ፈፅሞ አታቀናም። ግን አላህ የሚሻውን ሰው ያቀናል። እርሱም ቅኖቹን አዋቂ ነው።} [አልቀሶስ: 56]" አንተ መቃናቱን የወደድከውን ሰው አታቀናም። በአንተ ላይ ያለው ግዴታ ማድረስ ብቻ ነው። አላህ የሻውን ያቀናል።

• አጋሪያን ምንም ያህል ቅርብ ዘመድና ምንም ያህል በጎ ስራ የሚሰሩ ቢሆኑ እንኳ ለነርሱ ምህረት መጠየቅ ክልክል መሆኑን እንረዳለን።
• አባቶችንና ትላልቆችን በስህተት ነገር መከተል ከጃሂሊያ (የድንቁርና ዘመን) ሰዎች ተግባር መሆኑን እንረዳለን።
• ነቢዩ (የአላህ ሶላትና ሰላም በእርሳቸው ላይ ይስፈንና) ያላቸው ምሉእ እዝነት እና ሰዎችን በመጣራትና በማቅናት ላይ የነበራቸውን ጉጉት እንረዳለን።
• የአቡ ጧሊብ መስለምን በሞገተ ላይ መልስ ነው።
• የስራ መለኪያው በፍፃሜው ነው።
• ጥቅምን ለማስገኘት ወይም ጉዳትን ለመከላከል በነቢዩም (የአላህ ሶላትና ሰላም በእርሳቸው ላይ ይስፈንና) ይሁን በሌላ አካል ላይ መንጠልጠል ስህተት መሆኑን እንረዳለን።
• አውቆ፣ በእርግጠኝነትና አምኖበት "ላኢላሃ ኢለሏህ" ያለ ሰው እስልምና ውስጥ ገብቷል።
• መጥፎ ጓደኛና ሸረኛ ባልደረባ በሰው ልጅ ላይ የሚያደርሱትን ጉዳት እንረዳለን።
• የ"ላኢላሃ ኢለሏህ" ትርጉም: የጣኦት፣ የወሊዮች፣ የደጋጎች አምልኮን በመተው አላህን በአምልኮ መነጠል መሆኑንና አጋሪዎቹም ትርጉሙን ያውቁት እንደነበር እንረዳለን።
• አጋሪ በሽተኛ የመስለም ተስፋ ካለው ሊጠይቁት እንደሚፈቀድ እንረዳለን።
• ልብን ማቅናት አጋር በሌለው በአላህ እጅ ብቻ ያለ ነው። ነቢዩ (የአላህ ሶላትና ሰላም በእርሳቸው ላይ ይስፈንና) የሚመሩት (ወህይን) በመጠቆም፣ በማስተማርና በማድረስ ነው።

1. ዋና ገፅ
2. የተከበረው ቁርአንና ከቁርአን ጋር የተያያዙ እውቀቶች
3. የቁርአን ማብራሪያ
4. ሓዲሥ

1. ዋና ገፅ
2. ጥሪና ሰበካ
3. ወደ አላህ መጣራት
4. ሓዲሥ