?Tʋʋmã yaa yoobe, la nebã b yaa naase, yaa yel-yɩts a yiibu, tɩ yaa tɩlae tɩ yɩ, la bũmb ne a to bilgri, la yel-sõmde ne a buud piig taab rolbo, la yel-sõmd a yembre ne kobs-yopoe rolbo

Yii a Hʋraym ɭbn Faatik nengẽ, -Wẽnd yard be a yĩnga-, a yeelame, Wẽnd Tẽn-tʋʋma, -Wẽnd pʋʋsg la A tɩlgr be a yĩnga-, yeelame: «Tʋʋmã yaa yoobe, la nebã b yaa naase, yaa yel-yɩts a yiibu, tɩ yaa tɩlae tɩ yɩ, la bũmb ne a to bilgri, la yel-sõmde ne a buud piig taab rolbo, la yel-sõmd a yembre ne kobs-yopoe rolbo, la sã n yaa yel-yɩts a yiibu, tɩ yaa tɩlae tɩ yɩ : yaa tɩ ned ning sẽn maana kaalem n ka maan lagem-n-taar ne Wẽnde, a kẽeda arzãna, la ned ning sẽn maan kaalem t’a maana lagem-n-taar ne Wẽnde, a kẽeda Bugmẽ, la sã n yaa bũmb ne a to bilgrã : yaa ned ning sẽn na n saag tʋʋm sõngo, halɩ t’a sũurã wa tʋg n tags-a, tɩ Wẽnd sẽn mi t’a rɩka Anniy-kãngã wã A gʋlsda yel-sõmd a yembr n kõ-a, la ned ning sẽn tʋma wẽnga b gʋlsda wẽng a yembre n rogl-a, la sẽn tʋma yel-sõmde, b gʋlsda piig bilgri n kõ-a, la ned ning sẽn wa n yãka n nafe, sẽn yaa nafa ning fãa Wẽnd sorã poorẽ, yẽnda rolb yaa yel-sõmb kobs-yopoe. La sã n yaa ne nebã: be b pʋgẽ Wẽnd sẽn yalg a soab rɩtl dũni n na weoog a soab rɩtl laahr raarã, la ned b sẽn weoog a soab rɩtl dũni kaanẽ, n na n yalg a rɩtl laahr raarã, la ned b sẽn weoog a soab vɩɩm dũni la laahre, la ned b sẽn yols a soab vɩɩm dũni la laahr raare».
Sahih/Authentic. - Ahmad

Nabiyaamã, -Wẽnd pʋʋsg la A tɩlgr be a yĩnga-, kõo kibare, tɩ tʋʋmã yaa kõbg a yoobe, la nebã b yaa kõbg a naase, la sã n yaa tʋʋm a yoobã, bãmb yaa: Pipi : yaa ned ning sẽn maana kaalem n ka maan lagem-n-taar ne Wẽnde, arzãn yaa tɩlae ne-a. Yiib soaba : ned ning sẽn maan kaalem t’a maana lagem-n-taar ne Wẽnde, Bugmã yaa tɩlae ne yẽnda, t’a na n duum a pʋgẽ. La bãmb me la yel-yɩts a yiibu, tɩ yaa tɩlae tɩ yɩ wã. Tãab soaba : yaa yel-sõmd ned sẽn maan Anniy ne-a, rẽnd ned sã n maan Anniy ne yel-sõmde, n yaa sɩd soab ne Anniy wã, halɩ t’a sũurã meng wa tʋg n tags yel-kãngã, tɩ Wẽnd mi Anniy-kãngã a nengẽ, tɩ rẽnd poorẽ tɩ bũmb pɩʋʋge t’a ka tõog n maan-a, yel-sõmd-kãngã, b gʋlsda keoor sẽn pidi n kõ-a. La naas soaba: yaa yel wẽng ning b sẽn maanã, ned ning sẽn tʋma wẽnga, b gʋlsda yel wẽng a yembr n rogl-a. La bãmbã b yiibã yell ne a to bilgri, tɩ fãoog n paas ka be ye. Nu soaba : yaa yel-sõmb a yembr sẽn na n tall yel-sõama piig keoore, yẽ me yaa ned sẽn na n maan Anniy ne tʋʋm sõngo, n sɩd tʋm-a, b yʋlsda a yĩng yel-sõma piiga. Yoobe: yaa yel-sõmd a yembr sẽn na n fão kobs-yopoe, yẽ me yaa ned ning sẽn yãka n na n naf Wẽnd sorã pʋgẽ, rẽnd b gʋld-a-la yel-sõmd-kãngã, n kõ-a yel-sõma kobs-yopoe, la wãnde yaa Wẽnd kũunã ne A yembsã, A Naam yɩ wagell n zẽke. La sã n yaa nebã kõbgã, bãmba: Pipi soaba : yaa ned ning b sẽn yosl a soab vɩɩm dũni kaanẽ, ne rɩtla, n tar neemã dũni wã pʋgẽ, n maanda a sẽn rate, la b weooga a zug laahr raarã, t’a baasg na n yɩ Bugmẽ, yẽ me la kɩfr sẽn yaa rakãagre. Yiib soaba: yaa ned ning b sẽn weoog a soab dũni wã pʋgẽ rɩtl wεεngẽ la b yalg n kõ-a laahrẽ wã, yẽ soab baasg na n yɩ arzãna, yẽnda la sɩd-kõta sẽn yaa talga. Tãab soaba : yaa ned ning b sẽn weoog dũni kaanẽ la laahr raarã, la yẽnda yaa kɩfr ning sẽn yaa talgã. Naas soaba: yaa ned ning b sẽn yols a soab vɩɩm dũni wã la laahre, yẽ me la muunim ning sẽn yaa rakãagre.

  1. Hadiisã wilgda Wẽnd yɩɩdlemã la A bedremã, A Naam zẽkame, a yembsã zugu, la A sẽn fãood yel-sõmã.
  2. Wilgda Wẽnd tẽeg tɩrga la A kũunã ne A sẽn tʋmd ne tõnd yel wẽnsã ne tẽeg tɩrga, rẽnd yel wẽng a yembr rolb yaa zunuub a yembre.
  3. A wilgda lagem-n-taar ne Wẽndã zɩslem sẽn ta to-to, bala a mongda ned n yi arzãna.
  4. A wilgda yãk-n-naf Wẽnd sorã pʋgẽ wã yɩɩdlem.
  5. B sẽn fãood yãk-n-naf Wẽnd sorã zug yel-sõmbdã, tɩ sɩngd kobs-yopoe, bala yaa bũmb sẽn sõnged Wẽnd yʋʋrã zẽkre.
  6. A vẽnegd n wilgda nebã kõbgo, b sẽn yõs taaba.
  7. Ne b sẽn tõe n yols muunim dũni wã pʋgẽ wã, la zẽng sẽn ka muunimã, la yaoolem raarã, b ka na n yolse, rẽndame tɩ yaa muumin bala.

Successfully sent!