پێغەمبەر -صلى اللە علیە وسلم- كاتێك قسەی بۆ خەڵكی دەكرد؛ فەزڵ وپاداشتی مەزنی دوو كردەوەی ڕوونكردەوە: یەكەم: هەركەسێك بە ڕێكی وجوانی دەستنوێژ بگرێت بەو شێوەیەی لە سوننەتدا هاتووە، وهەر ئەندامێك مافی خۆی پێبدات؛ پاشان بڵێت: (أشهد أن لا إله إلا الله وأن محمدًا عبد الله ورسوله) واتە: (شاهێدی دەدەم بەوەى هیچ پەرستراوێک هەق وڕاست نییە کە شایستەی پەرستن بێت جگە لە الله، وشاهێدی دەدەم بەوەى کە موحەمەد -صلى اللە علیە وسلم- پێغەمبەری خودایە) ؛ ئەوا هەر هەشت دەرگاكەی بەهەشتی بۆ دەكرێتەوە ولە هەركامێكیان بیەوێت دەچێتە نێویەوە. دووەم: هەركەسێك بەم شێوە ڕێك وكامڵە دەستنوێژ بگرێت، پاشان لەپاش دەستنوێژگرتن دوو ڕكات نوێژ بكات؛ بە دڵسۆزی وخشوعەوە وڕوو وهەموو ئەندامەكانی لاشەی ملكەچ بن بۆ الله، ئەوا چوونە بەهەشت بۆ ئەم كەسە مسۆگەر كراوە.

• مەزنی فەزڵی خوای گەورە -سبحانه وتعالی- ئەمیش بە بەخشینی پاداشتی زۆر وگەورە لەسەر كردەوەیەكی كەم.
• ڕێگەپێدراوی: دەستنوێژگرتن بە جوانی وکامڵی، وئەنجامدانى دوو ڕکات نوێژ بە خشوع لە پاش دەستنوێژگرتن ؛ ئەمە هۆکارە بۆ بەدەستهێنانى پاداشتی زۆر ومەزن.
• دەستنوێژگرتن بە جوانى، و ووتنی ئەم زیکرە ڕاستەوخۆ لە پاش دەستنوێژگرتن، لە گەورەترین هۆکارەکانە بۆ چوونە بەهەشت.
• بۆ ئەو كەسەیشی خۆی شۆردووە ؛ سوننەتە ئەم زیكرە بڵێت.
• بەپەرۆشی هاوەڵان لەسەر خێر؛ لە فێربوون وبڵاوكردنەوەی، وهاوكاری كردنی یەكتر لەسەر ئەم بابەتە ولە كاروباری گوزەرانیان.
• زیكر كردن لەپاش دەستنوێژگرتن هۆكارە بۆ پاككردنەوە وڕزگاركردنی دڵ لە شیرك -هاوبەشدانان-، هەروەكو چۆن دەستنوێژگرتن هۆكارە بۆ پاككردنەوەی لاشە وخاوێنكردنەوە وڕزگاركردنی لە چڵك وپیسییەكان.