ഉഥ്മാൻ -رَضِيَ اللَّهُ عَنْهُ- നബി -ﷺ- യുടെ വുദൂഇൻ്റെ രൂപം പ്രവർത്തിയിലൂടെ പഠിപ്പിച്ചു നൽകുകയാണ് ഈ ഹദീഥിലൂടെ. കാരണം വുദൂഇൻ്റെ രൂപം ഏറ്റവും വ്യക്തമായി വിവരിക്കാൻ സാധിക്കുന്ന മാർഗമാണത്. ആദ്യം അദ്ദേഹം ഒരു പാത്രത്തിൽ വെള്ളം ആവശ്യപ്പെട്ടു. ശേഷം തൻ്റെ രണ്ട് കൈകൾക്ക് മേലെയും മൂന്ന് തവണ വെള്ളമൊഴിച്ചു. അതിന് ശേഷം വലതു കൈ പാത്രത്തിൽ പ്രവേശിപ്പിക്കുകയും, അതു കൊണ്ട് വെള്ളം കോരിയെടുക്കുകയും, പിന്നീട് തൻ്റെ വായിൽ വെള്ളം പ്രവേശിപ്പിച്ച് കൊപ്ലിക്കുകയും അത് പുറത്തേക്ക് തുപ്പിക്കളയുകയും ചെയ്തു. ശേഷം മൂക്കിൽ വെള്ളം കയറ്റുകയും, അത് ഉള്ളിലേക്ക് വലിക്കുകയും, പിന്നീട് പുറത്തേക്ക് ചീറ്റിക്കളയുകയും ചെയ്തു. അതിന് ശേഷം മൂന്ന് തവണ അദ്ദേഹം തൻ്റെ മുഖം കഴുകി. പിന്നീട് കൈമുട്ടുകൾ ഉൾപ്പെടെ തൻ്റെ കൈ മൂന്ന് തവണ കഴുകി. ശേഷം തൻ്റെ കൈകൾ നനവുള്ള അവസ്ഥയിൽ തലയിലൂടെ അദ്ദേഹം ഒരു തവണ തടവി. ശേഷം രണ്ട് കാലുകളും നെരിയാണി ഉൾപ്പടെ മൂന്ന് തവണ കഴുകയും ചെയ്തു. ഇപ്രകാരം തൻ്റെ വുദൂഅ് പൂർത്തീകരിച്ചതിന് ശേഷം അദ്ദേഹം പറഞ്ഞു: നബി -ﷺ- ഇപ്രകാരം വുദൂഅ് ചെയ്യുന്നത് ഞാൻ കണ്ടിട്ടുണ്ട്. ആരെങ്കിലും അവിടുന്ന് വുദൂഅ് ചെയ്തത് പോലെ വുദൂഅ് നിർവ്വഹിക്കുകയും, ശേഷം രണ്ട് റക്അത്തുകൾ -ഭയഭക്തിയോടെയും അല്ലാഹുവിന് മുൻപിലാണ് താൻ നിൽക്കുന്നത് എന്ന ഹൃദയസാന്നിദ്ധ്യത്തോടെയും- നമസ്കരിക്കുകയും ചെയ്താൽ അല്ലാഹു ഈ പൂർണ്ണമായ വുദൂഇനും നിഷ്കളങ്കമായ നമസ്കാരത്തിനുമുള്ള പ്രതിഫലമായി അവൻ്റെ മുൻകഴിഞ്ഞ പാപങ്ങൾ പൊറുത്ത് നൽകുന്നതാണ്.

• ഉറക്കത്തിൽ നിന്നുണർന്ന ശേഷമല്ലെങ്കിൽ വുദൂഇൻ്റെ തുടക്കത്തിൽ പാത്രത്തിൽ കൈ മുക്കുന്നതിന് മുൻപ് രണ്ട് കൈകളും കഴുകൽ സുന്നത്താണ്. എന്നാൽ ഉറക്കത്തിൽ നിന്ന് എഴുന്നേറ്റു വന്ന സന്ദർഭത്തിലാണെങ്കിൽ ഇപ്രകാരം കഴുകൽ നിർബന്ധവുമാണ്.
• കാര്യങ്ങൾ ഗ്രഹിക്കാൻ ഏറ്റവും സഹായകമായ, വിജ്ഞാനം ഹൃദയത്തിൽ ആഴത്തിൽ വേരൂന്നുന്ന വിധത്തിലുള്ള അദ്ധ്യാപനരീതിയാണ് അദ്ധ്യാപകന്മാർ സ്വീകരിക്കേണ്ടത്. അതിൽ പെട്ടതാണ് പ്രവർത്തിയിലൂടെ ഒരു കാര്യം പഠിപ്പിക്കുക എന്നത്.
• ഐഹിക ജീവിതവുമായി ബന്ധപ്പെട്ട ചിന്തകൾ അകറ്റി നിർത്താൻ നിസ്കാരവേളയിൽ ശ്രദ്ധിക്കേണ്ടതുണ്ട്. നിസ്കാരത്തിൻ്റെ പൂർണ്ണതയും കൃത്യതയും ഹൃദയസാന്നിദ്ധ്യത്തിൽ നിന്നാണ് ഉണ്ടാകുന്നത്. എന്നാൽ നിസ്കാരത്തിൽ മറ്റു ചിന്തകൾ ഉണ്ടാവുക എന്നത് ഉറപ്പായും സംഭവിക്കുന്നതാണ്; പക്ഷേ അവയെ തടുത്തു നിർത്താൻ അവൻ പരിശ്രമിക്കുകയും, അത്തരം ചിന്തകളിൽ തുടർന്നു പോകാതിരിക്കാൻ ശ്രദ്ധിക്കുകയും വേണ്ടതുണ്ട്.
• വുദൂഅ് ചെയ്യുമ്പോൾ ആദ്യം വലതു ഭാഗം മുന്തിക്കുന്നത് സുന്നത്താണ്.
• വായിൽ വെള്ളം കൊപ്ലിക്കുക, ശേഷം മൂക്കിൽ വെള്ളം കയറ്റുക, ശേഷം വെള്ളം (മൂക്കിൽ നിന്ന്) ചീറ്റിക്കളയുക എന്നത് ഈ പറഞ്ഞ ക്രമത്തിൽ നിർവ്വഹിക്കുന്നതാണ് നല്ലത്.
• മുഖവും കൈകളും കാലുകളും മൂന്ന് തവണ കഴുകുക എന്നത് സുന്നത്താണ്. ഒരു തവണ കഴുകിയാൽ നിർബന്ധബാധ്യത പൂർത്തീകരിക്കപ്പെടുന്നതാണ്.
• അല്ലാഹു മുൻകഴിഞ്ഞ പാപങ്ങൾ പൊറുത്തു നൽകുമെന്ന് പറഞ്ഞത്; ഹദീഥിൽ പറഞ്ഞതു പോലെ പൂർണ്ണമായി വുദൂഅ് ചെയ്യുകയും രണ്ട് റക്അത്തുകൾ നിസ്കരിക്കുകയും ചെയ്യുന്നതിന് ഒരുമിച്ചുള്ള പ്രതിഫലമായി കൊണ്ടാണ്.
• വുദൂഇൻ്റെ ഓരോ അവയവങ്ങൾക്കും (വെള്ളം എത്തേണ്ട) കൃത്യമായ അതിരുകളുണ്ട്. മുഖത്തിൻ്റെ അതിരുകൾ: സാധാരണയായി മുടി മുളക്കുന്ന ഭാഗം മുതൽ താടിയുടെയും രണ്ട് താടിയെല്ലുകളുടെയും താഴ്ഭാഗം വരെ നീളമായും, രണ്ട് ചെവിക്കുറ്റികൾക്ക് ഇടയിൽ വീതിയായും കണക്കാക്കപ്പെട്ടിരിക്കുന്നു. കൈകളുടെ അതിരുകൾ: വിരലുകളുടെ അറ്റം മുതൽ ആരംഭിക്കുകയും, മുട്ടുകൾ ഉൾപ്പടെയുള്ള ഭാഗം വരെ നീളുകയും ചെയ്യുന്നു. തലയുടെ അതിരുകൾ: മുടി സാധാരണയായി മുളക്കുന്ന ഭാഗം മുതൽ പിരടിയുടെ മുകൾ ഭാഗം വരെയാണ്. ചെവികൾ തടവുക എന്നത് തലതടവുന്നതിൻ്റെ ഭാഗമായാണ് എണ്ണപ്പെടുക. കാലുകളുടെ അതിരുകൾ: കാൽപ്പാദം മുഴുവനായും, കണങ്കാലിനും കാലിനും ഇടയിലുള്ള സന്ധിയുൾപ്പെടെയുമാണ്.

1. മെയിൻ പേജ്
2. കർമ്മശാസ്ത്രവും, കർമ്മശാസ്ത്ര അടിസ്ഥാനങ്ങളും
3. ആരാധനയുടെ കർമ്മശാസ്ത്രം
4. ശുദ്ധീകരണം
5. വുദ്വൂഅ്
6. വുദൂഇൻ്റെ രൂപം
7. ഹദീസ്

• നബി -ﷺ- (ഓരോ അവയവങ്ങളും) ഒരൊറ്റ തവണ മാത്രമായി (കഴുകിക്കൊണ്ട്) വുദൂഅ് ചെയ്തിട്ടുണ്ട്
• ചില മടമ്പുകൾക്ക് നരകത്തിൽ നിന്നുള്ള നാശം! നിങ്ങൾ വുദൂഅ് പൂർണ്ണമായി നിർവ്വഹിക്കുക
• നബി -ﷺ- ഈരണ്ട് തവണകളായി വുദൂഅ് ചെയ്തു
• നബി -ﷺ- യുടെ വുദൂഅ് അവർക്ക് വേണ്ടി ചെയ്തു കാണിച്ചു കൊടുത്തു