Nabiyaamã -Wẽnd pʋʋsg la A tɩlgr be a yĩnga- vẽnegdame n wilgd yεl sãnda tɩ b maanegã yaa lagem-n-taare, sẽn be b pʋgẽ: Rẽenem: yaa Rʋƙɩyya (walem n fʋʋse): yẽ me la gom-biis nins zɩɩlemã rãmb sẽn tɩpd ne-a tɩ b yaool n naaga ne lagem-n-taar biisi. Yiibu: yaa yεl boabdɩ wã, sẽn yaa wala kĩnd biisi la sẽn wõnd rẽ: b sẽn rɩkd n bobd koambã la rũmsã la sẽn ka bãmbã sẽn na yɩlẽ tɩ liuuli ra wa paam-b ye. Tãabo: yaa nonglemã tɩɩm: yẽ me la bũmb ninga b sẽn maande sẽn na yɩlẽ tɩ yi-kãadb a yiibã nong taaba. Rẽnd yεl-kãensã yaa lagem-n-taare, bala a bee bũmb fo sẽn na n rɩke n maan t'a yaa sababo, t'a yaool n ka sababo sari wã sẽn kõ t'a tar tikr ye, a leb n ka sabab me sẽn yaa vẽenega tɩ b minim-a t'a yɩtame ye. La sã n yaa sabab-rãmb nins sari wã sẽn kõ sore, wala Alkʋrãan karengo, maa yaa yεl nins b sẽn ne tɩ yaa vẽenega, wala tɩto, a zarb-n-gesgã b sẽn bãng-a, yẽ soabã sakdame, la ne rẽ fãa yaa f loe n wãag f sũurẽ wã tɩ b yaa sabab-rãmbã la f bãng tɩ nafa la namsgo, b bee Wẽnd nugẽ.

• Yaa Wẽnd yembgã la loεεgã gũubu n yi bũmb ning sẽn tõe n keoos-a.
• Hadiisã wilgdame tɩ yaa haraam tɩ b maan (Rʋƙɩyya (karem n tʋbs-rãmb) nins lagem-n-taar sẽn be a pʋgẽ wã la yoadã bobre la nonglemã tɩɩmã maanego.
• Ninsaal sã n wa loe n wãag yel-kãensã b tãabã, tɩ b yaa sabab-rãmba, yẽnda wakat-kãnga yaa lagem-n-ta bila, bala a rɩka bũmb ning sẽn ka sabab t'a yaa sababo, la a sã n tol n loe tɩ b nafdame la b namsdẽ, b mens yĩnga, yẽ lebga lagem-n-taar sẽn yaa kasẽnga.
• Hadiisã bugsdame n yit sabab-rãmb nins sẽn yaa lagem-n-taarã la sẽn yaa haraamã.
• A gɩdgda Rʋƙɩyya (karem-n-tʋbs) nins sẽn yaa haraamã, sã n ka sẽn wa n mik tɩ yaa sari wã n kõ sore.
• Sõmbame tɩ sũurã yaglg ne Wẽnd A Yembre, bala namsg la nafa yita Yẽ A Yembr nengẽ, lagem-n-taag ka be ne-A ye, rẽnd ka wat ne sõmblem rẽnda Wẽnde, leb n ka tusd wẽng me sã n ka Wẽnde, A Naam zẽkame.
• Rʋƙɩyya (karem-n-tʋbs-rãmb) nins sẽn sakdã, bãmb la sẽn kʋmd sart-rãmb a tãabã: 1- Yaa sẽn na n loe t'a yaa sababo, ka tõe n naf tɩ sã n ka Wẽnd tõog ye. 2- Yaa a yɩ ne Alkʋrãanã la Wẽnd yʋyã la A sɩf-rãmbã la Nabiyaamã sẽn da tar n kotẽ wã la doos nins sari wã sẽn kõ sorã. 3-Yaa t'a tũ ne goam b sẽn fasẽmde a ka bũmb sẽn lagem ne gom-biis b sẽn ka fasẽmde, la tɩto.