ഹജ്ജത്തുൽ വദാഇൻ്റെ വേളയിൽ നബി -ﷺ- സ്വദഖ വീതിച്ചുകൊണ്ടിരിക്കുമ്പോൾ രണ്ട് ആളുകൾ അവിടുത്തെ അടുക്കൽ വരികയും, ആ ദാനത്തിൽ നിന്ന് തങ്ങൾക്കും നൽകണമെന്ന് ആവശ്യപ്പെടുകയും ചെയ്തു. അപ്പോൾ അവരുടെ അവസ്ഥ മനസ്സിലാക്കുന്നതിനും, അവർക്ക് സ്വദഖ അനുവദനീയമാണോ അല്ലയോ എന്ന് തിരിച്ചറിയുന്നതിനും വേണ്ടി നബി -ﷺ- അവരെ വീണ്ടും വീണ്ടും നോക്കി. അവർ കരുത്തരായ രണ്ട് പുരുഷന്മാരാണെന്ന് കണ്ടപ്പോൾ നബി (ﷺ) പറഞ്ഞു: "നിങ്ങൾ ആഗ്രഹിക്കുന്നുവെങ്കിൽ സ്വദഖയിൽ നിന്ന് ഞാൻ നിങ്ങൾക്ക് നൽകാം. (എന്നാൽ) ആവശ്യത്തിന് സമ്പത്തുള്ളവനും, അധ്വാനിച്ച് സമ്പാദിക്കാൻ കഴിവുള്ളവനും ഇതിൽ വിഹിതമില്ല." അധ്വാനിക്കാൻ കഴിവുള്ളവൻ്റെ കൈവശം നിലവിൽ സമ്പത്തില്ലെങ്കിൽ പോലും അവന് അർഹതയില്ല.

• ധനികരോ അധ്വാനിച്ച് ജീവിക്കാൻ കഴിവുള്ളവരോ സമ്പത്ത് ചോദിച്ചുവാങ്ങുന്നത് ഹറാമാണ് (നിഷിദ്ധമാണ്).
• ഒരാൾക്ക് സമ്പത്തുണ്ടോ എന്ന അറിവില്ലെങ്കിൽ, അടിസ്ഥാനപരമായി അവൻ ദരിദ്രനാണെന്നും സ്വദഖക്ക് അർഹനാണെന്നും കണക്കാക്കാം.
• ശാരീരിക ശേഷിയുണ്ട് എന്നത് കൊണ്ട് മാത്രം സ്വദഖക്ക് അർഹതയില്ലാതാകുന്നില്ല. മറിച്ച് അതോടൊപ്പം അധ്വാനിച്ച് സമ്പാദിക്കാനുള്ള കഴിവും കൂടി ഉണ്ടായിരിക്കണം.
• തനിക്ക് ആവശ്യമായത് അധ്വാനിച്ച് സമ്പാദിക്കാൻ കഴിവുള്ളവന്, നിർബന്ധ ബാധ്യതയായ സ്വദഖയിൽ (സകാത്ത്) നിന്ന് എടുക്കാൻ പാടില്ല. കാരണം ധനികൻ തൻ്റെ പക്കലുള്ള സമ്പത്ത് കൊണ്ട് ജീവിതാവശ്യങ്ങൾ നിറവേറ്റുന്നത് പോലെ, ഇയാൾ തൻ്റെ അധ്വാനത്തിലൂടെ കാര്യങ്ങൾ നിറവേറ്റാൻ ശ്രമിക്കേണ്ടതാണ്.
• മുസ്‌ലിമായ ഒരു വ്യക്തിക്ക് ആത്മാഭിമാനം ഉണ്ടായിരിക്കണമെന്നും, ചോദിച്ച് വാങ്ങുന്നതിനേക്കാളും യാചിക്കുന്നതിനേക്കാളും മടിച്ചിരിക്കുന്നതിനേക്കാളൂം നല്ലത് ദാനം ചെയ്യുക എന്നതാണെന്നുമുള്ള മഹത്തായ പ്രവാചക പാഠം ഈ ഹദീഥിലുണ്ട്.