တမန်တော်မြတ် (ဆွလ္လလ္လာဟုအလိုင်ဟိဝစလ္လမ်)သည် ဖရဿ်ွဆွလာသ်ဖြစ်စေ စွန်နသ်ဆွလာသ်ဖြစ်စေ ဝတ်ပြုနေသူ၏ရှေ့မှ ဖြတ်သွားခြင်းမပြုရန် သတိပေးတားမြစ်ထားသည်။ အကယ်၍ ထိုသူသည် ဆွလာသ်ဝတ်ပြုနေသူရှေ့မှ သိလျက်တမင်ဖြတ်သွားသူ ရရှိမည့်အပြစ်ကို သိရှိပါက လေးဆယ်ကြာသည်အထိ စောင့်ဆိုင်းခြင်းကို ရွေးချယ်လိမ့်မည်ဖြစ်သည်။ ဤသည် ၎င်းအဖို့ ဆွလာသ်ဝတ်ပြုနေသူ၏ရှေ့မှ ဖြတ်သွားခြင်းထက် ပို၍‌ကောင်းပေသည်။ ဟဒီးစ် ဆင့်ပြန်သူရာဝီ အဗွန်နဿွရ်က " တမန်တော်မြတ်သည် ရက်လေးဆယ်ဟု ပြောခဲ့ခြင်းလား၊ လ ပေါင်းလေးဆယ်ဟု ပြောခဲ့ခြင်းလား သို့မဟုတ် နှစ် ပေါင်းလေးဆယ်ဟု ပြောခဲ့ခြင်းလား ဆိုသည်ကို ကျွန်ုပ်မသိပါ" ဟု ဆိုသည်။

• ၁။ ဆွလာသ်ဝတ်ပြုသူ၏ ရှေ့တွင် စွသ်ရဟ် (အကာအရံ) မရှိပါက သူ၏ရှေ့မှ ဖြတ်သွားခြင်းကို ဟရာမ်အဖြစ် တားမြစ်သည်။ သို့မဟုတ် စွသ်ရဟ်(အကာအရံ) ရှိသော်လည်း ဆွလာသ်ဝတ်ပြုသူနှင့် စွသ်ရဟ်ကြားမှ ဖြတ်သွားခြင်းကို တားမြစ်သည်။
• ၂။ အစ်ဗ်နုဟဂျရ်က ဤကိစ္စနှင့်ပတ်သက်၍ သတ်မှတ်တိုင်းတာမှု၌ ကွဲလွဲခဲ့ကြသည်။ အချို့က ဆွလာသ်ဝတ်ပြုသူနှင့် ၎င်းစဂ်ျဒဟ်ဦးချသည့်နေရာအတိုင်းအတာကြားမှ ဖြတ်သွားခြင်းဟု ဆိုသည်။ အချို့က ဆွလာသ်ဝတ်ပြုသူနှင့် သုံးတောင်အကွာအဝေးကြားမှ ဖြတ်သွားခြင်းဟု ဆိုသည်။ အချို့ကမူ ဆွလာသ်ဝတ်ပြုသူနှင့် ကျောက်ခဲတစ်လုံးပစ်နိုင်သော အကွာအဝေးကြားမှ ဖြတ်သွားခြင်းဟု ဆိုသည်။
• ၃။ စူယူသွီက ဖြတ်သွားခြင်းဆိုသည်မှာ သူ၏ရှေ့မှ အလျားလိုက် ဖြတ်သွားခြင်းကိုဆိုလိုသည်။ သို့သော် သူ၏ရှေ့မှ ကစ်ဗ်လာဘက်သို့ လမ်းလျှောက်သွားခြင်းသည် ဝအီးဒ် ( ဟဒီးစ်တွင်လာရှိထားသော ခြိမ်းခြောက်မှု )တွင် မပါဝင်ပေ။
• ၄။ ဆွလာသ်ဝတ်ပြုသူအတွက် အကောင်းဆုံးနည်းလမ်းမှာ လူသွားလမ်းများနှင့် လူတိူ့ မဖြစ်မနေဖြတ်သန်းသွားရမည့် နေရာများတွင် ဆွလာသ်မဝတ်ပြုရန်ဖြစ်ပြီး၊ ဤသည် ဆွလာသ်၏ပြီးပြည့်စုံမှုကို အနှောင့်အယှက်ဖြစ်စေခြင်းနှင့် ဖြတ်သွားသူများကို အပြစ်ဖြစ်စေခြင်းမှ ရှောင်ကြဉ်ရန် ဖြစ်သည်။ ထိုနည်းတူ ဖြတ်သွားသူများနှင့် သူ၏ကြားတွင်အကာအရံ တစ်ခုခုပြုလုပ်ထားရှိရန် လိုအပ်သည်။
• ၅။ ဤဟဒီးဆ်တော်ကနေ သိရှိရသည်မှာ အပြစ်ကျူးလွန်ခြင်းကြောင့် နောင်တမလွန်ဘဝတွင် ရရှိမည့်အပြစ်သည် သေးငယ်သော်လည်း ဤလောကီဘဝ၌ ကြုံတွေ့ရသော မည်သည့်ပြင်းထန်သည့် အခက်အခဲထက်မဆို ပိုမိုကြီးမားလေးနက်သည်ကို နားလည်နိုင်သည်။