امیر المؤمنین ابو بکر صدیق رضی الله عنه د هجرت پر مهال وویل: ما د مشرکانو پښو ته وکتل چې زموږ د سرونو د پاسه د ثور د غار پر سر ولاړ وو او موږ پکې وو، ما وویل: اې د الله رسوله، که یو له دوی خپلو پښو ته لاندې وګوري، نو موږ به وویني، هغه وفرمایل: اې ابو بکره، ته د هغو دوو په اړه څه ګومان کوې چې په نصرت، مرسته، ساتنه او لارښوونه کې یې الله تعالی درېیم و؟!

• د ابو بکر صدیق رضي الله عنه فضیلت دا دی چې د محمد صلی الله علیه وسلم سره یې د مکې نه مدینې ته د هجرت په سفر کې ملګرتیا وکړه، او خپل اهل او مال یې پرېښودل.
• د ابو بکر صدیق رضی الله عنه شفقت، د محمد صلی الله علیه وسلم سره د هغه د مینې کچه، او پر هغه د دښمنانو له خطره وېره.
• پر الله تعالی باور کول واجب دي، او د احتیاط او هڅې وروسته د هغه په ساتنه او پاملرنه ډاډه اوسېدل.
• پېغمبرانو او اولیاوو ته د الله تعالی پاملرنه، او په بریا ورکولو سره یې مرسته کول؛ الله تعالی فرمایلي: (‌إِنَّا ‌لَنَنْصُرُ ‌رُسُلَنَا وَالَّذِينَ آمَنُوا فِي الْحَيَاةِ الدُّنْيَا وَيَوْمَ يَقُومُ الْأَشْهَادُ)، (بېشكه مونږ خامخا د خپلو رسولانو او د هغو كسانو چې ایمان يې راوړى دى، په دنيايي ژوند كې مرسته كوو او په هغې ورځ كې (هم) چې ګواهان به ودرېږي).
• دې خبرې ته پاملرنه چې څوک پر الله توکل وکړي، الله به ورته بس شي، مرسته به یې وکړي، نصرت به ورسره وکړي او ساتنه به یې وکړي.
• د محمد صلی الله علیه وسلم د خپل رب په وړاندې بشپړ توکل، چې ټول کارونه یې هغه ته سپارلي او په هغه یې تکیه درلوده.
• د محمد صلی الله علیه وسلم زړورتیا او د خلکو د زړونو او روحونو آرامول.
• د دښمن له ویرې د خپل دین د ژغورلو په موخه تېښته کول او اسباب کارول.

1. کور‌پاڼه
2. سیرت او تاریخ
3. حدیث